• Балаларға базарлық
• 28 Қаңтар, 2023

«Мұзайдын тайғанақ екен...»

Бағдат МӘЖИТОВ

Кішкентай Әйгерім анасымен бірге мұзайдынға барды. Онда балық бейнесіндегі ерекше шаналар бар екен. Анасы Әйгерімді сондай шанаға отырғызды. Содан соң артынан итеріп, конькимен сырғанады. Осылайша олар мұзайдынды бірнеше рет айналды. 
Қайтарда Әйгерім шанадан түспек болып еді, аяғы тайып кетті. 
Анасы:
–Тоқта! Абайла! – дегенше көк мұздың үстінде жамбастай құлап, бақырып жылап жіберді.
Үйге келген соң сағына күтіп отырған әжесі Әйгерімді құшағына алып:
– Балапаным, мұзайдын ұнады ма? Келер жолы мен де барсам бола ма? – деп сұрады.
– Әже, бармаңыз! – деді Әйгерім аптыға жауап қатып. – Құлап қаласыз. Мұзайдын тайғанақ екен.

Суретін салған Наталья Ященко