• БАЛДЫРҒАН
• 15 Тамыз, 2024

БІЛІМГЕ САПАР

Әли ЫСҚАБАЙ

Жадырап атты таң күліп,
Ұйқымды алғам қандырып.
Қоңырау үнін ести сап,
Мектепке тарттым сән құрып.

Өзімше мен де батылмын,
Ұясын іздеп ақылдың,
Арқамда сөмке, қолда гүл,
Мектепке келе жатырмын.

Мектепке қадам басамын,
Шашу ғып гүлді шашамын.
Партаға алғаш отырып,
Білімнің кілтін ашамын.

Өмірге жарқын ұмтылып,
Жүрегім толқып, бұлқынып,
Ата-анам қалар қуанып,
Жайнасам гүлдей құлпырып.

Басталды сапар білімге,
Ынта да басым ілімге.
«Оқыңдар жақсы!» дегендей,
Қарайды күліп Күнім де.