• БАЛДЫРҒАН
• 26 Сәуір, 2023

Ботаникалық бақты аралау

Ғажайып мекен

Оң болсын деп талабым,
Барыңды біл, жете аңғар.
Ортасында қаланың,
Ғажайып бір мекен бар.

Бәрін баптап, өсірді,
Гүлдерін де, талын да.
Алуан түрлі өсімдік,
Ботаника бағында.

Келгенінде сары күз,
Бақ құлпырар,
Байқайық.
Ал ендеше,
Бәріміз,
Бақты аралап қайтайық.

Кеңейеді танымың,
Атаныңдар нар ұлдар.
Атын,
Сырын бәрінің,
Еске сақтап алыңдар.

Өгейбұта

Бастағандай жаңа өмір,
Жатқандай-ақ тұтанып.
Көрдіңдер ме, әнебір,
«Жанып тұрған бұтаны».

Ұсақ жеміс тізді өңшең,
Өспейді әрі ұзарып.
Жапырағы күз келсе,
Шыға келер қызарып.
 

Арша

Қазақпен дос тегінде,
Оған айтқан бар әні.
Арша өскен жерінде,
Тазартады ауаны.

Асқан кім бар халықтан,
Аршада мән бар депті.
Бүршігінен, қабықтан,
Дайындайды дәрмекті.

Пайдасы көп нешеме,
Түрлі бұйым қашайды.
Арша баяу өседі,
Алты жүз жыл жасайды.

Қаржеміс

Көрсең дерсің: 
ол рас па?
Пияз сынды түр-өңі.
Жеміс емес, ағаш та,
Бұтаның бір түрі еді.

Бұта ғажап сәнденген,
Болмас оны ұстауға.
Адамға улы болғанмен,
Қорек болар құстарға.

Жемес мұны барлық аң,
Қоян лайық жегенге.
Біздің елде дәл бұдан,
Басқа жерде жоқ өңге.
 

Вирджиния гамамелесі
 

Өсімдіктің тізімі,
Таусылмайтын жыр дейді.
Гамамелес,
Қызығы,
Күз келгенде гүлдейді.

Сырын оның кім білер,
Әбден зерттеп, арала.
Жапырағын үнділер,
Қолданады жараға.

Құнын оның бекерге,
Білмей тұрып түсірме.
Қолданады шетелде,
Опа-далап үшін де.
 

Шетен

Өспегенмен түп-түзу,
Қарамассың таңғалмай.
Мойынына қып-қызыл
Моншақ тағып алғандай.

Сары,
Қызыл «моншағы»,
Ол –
Шетеннің жемісі.
Оның-дағы бар сәні,
Мұздатқан жөн жеу үшін.

Саналады ардақты,
Жапса көркем жол үстін –
Көп-көп өлең арнапты,
Ақындары орыстың.

Хризантема

Гүл сырын кім түсінер,
Ерек боп тұр қатардан.
Әсемдігі үшін ол,
«Күз патшайымы» атанған.

Сұлу дедік түс-өңі,
Жанға сыйлар жайлылық.
Қытайлықтар ішеді,
Жапырағын шай қылып.

Тасжапырақты күймесгүл

Түрлері көп тіндердің,
Бірдей емес тал-шыбық.
Кейбір әсем гүлдердің 
Зияны да баршылық.

Зияндығы күшті аса,
Алыстан бақ неғұрлым.
Күймесгүлді ұстасаң,
Күйдіреді теріңді.

Жөке

Сурет салып жатыр күз,
Ғажайып-ақ
Расында.
Жүріп келе жатырмыз,
Жөке аллеясында.

Тізіліп тұр бірнеше,
Әскерменен пара-пар.
Жөке ағашы гүлдесе,
Хош иісін таратар.

Жиі келсең бұл баққа,
Ұғарсың-ақ сен сырын.
Жөкеден 
Бал қылмаққа,
Ара алады мол шырын.

Асылан ТІЛЕГЕН