• Әңгіме
• 22 Ақпан, 2023

Жапырақ пен дауыл

(Мысал әңгіме)

Меңдібай  ӘБІЛҰЛЫ

Күз келді. Адамдар ағаштардан түскен жапырақтарды сыпырғышпен жинап, арық жағасына үйіп қойды. Енді өртеу керек.

Жапырақтар Дауылдан көмек сұрады.

– Бізді адамдар отқа жағып жібергелі жатыр, – деді жапырақтардың бірі ұйықтап жатқан Дауылды оятып. – Құтқара гөр!

– Кім-м-м?

– Адамдар!

–  Иә, иә, – деп шуласты жапырақтар жыламсырап. – Бізді өртегелі жатыр,  құтқарыңыз!

– Қалай? Бұл мүмкін емес қой...

Осы аралықта жақын жерде жүрген кірпі жүгіріп келді Дауылға:

– Бізге көмек беріңіз! Жапырақтар жанып кететін болды. Олар менің досым. Күзде оларды үйіме жинап алушы ем, – деді ол жалынып.

Дауыл жол шетінде үйіліп жатқан жапырақтарды аяп кетті.

–  Бұл адамдар қандай қатыгез болып кеткен?! –  деді сосын түсі бұзылып. –  Сендерді не үшін өртейді? Сендердің пайдаларың ұшан-теңіз емес пе. Соны біле тұра, қалай зұлымдық жасайды? Сендер топыраққа араласып жерді тыңайтасыңдар. Үлкен ағаштар тамыры суықта үсіп қалмау үшін сендерді жамылып жатады ғой...

–  Иә, иә...  Біздің қоршаған ортаға тигізер пайдамыз мол. Адамдар соны білмейді, – деді жапырақтар мұңайып.

– Сендерді орманға, тауға, құстың қанаты талатын ұлан-байтақ далаға ұшырып апарып тастаймын, – деді Дауыл күлімсіреп. – Қамықпаңдар, мен сендерді аман алып қаламын!

–  Иә, сөйтіңіз, – деді жапырақтар шулап.

Кенет Дауыл өте қатты жылдамдықпен соға бастады да, төңірек алай-түлей болып кетті. Үйіліп жатқан жапырақтар қобырай шашылып, жан-жаққа ұша бастады.

Адам қолындағы сіреңкесін жағып үлгермеді. Ұйытқи соққан Дауыл «быж» етіп жанған сіреңкені өшіріп тастады.

Сарғайған жапырақтар өздерін оттан аман алып қалған Дауылға қатты риза болды.

–  Сізге айтар алғысымыз шексіз! – десті қуанышқа бөленген олар жамырасып.

                                                                                                         Тараз қаласы.

Суретін салған Ерлан Момбаев