• Балаларға базарлық
• 28 Қаңтар, 2023

Өлеңдер топтамасы

Мира ИБРАЕМОВА

ӘНҰРАН

«Алтын күн – аспаны»,
Деп шырқар жастары!
Әнұран сыр шертер,
Елімнің дастаны!

Рухты елімде,
Дем беріп сенімге!
Әнұран шырқалар,
Жеңістер төрінде!

ЖАЛҒАС

Жан әкемнің – күнімін,
Анашымның – гүлімін.
Еркелеймін оларға,
Балдай тәтті қылығым.

Болашаққа біліммен,
Аттанбақпын бүгін мен.
Ел ертеңі жалғаспақ,
Қызы – нәзік гүлімен.
 

СПОРТ

Спорт – менің серігім,
Шымыр дене – көрігім.
Айналыссам спортпен,
Арта түсер сенімім.

Аянбаймын ел үшін,
Зор еңбектің жемісін – 
Бір кісідей сыйлаймын,
Олимпиада жеңісін.

САЛТ-ДӘСТҮРІМ

Салт-дәстүрі халқымның,
Көрсететін бар қырын.
Салт-дәстүрім – қазынам,
Қолымда бар алтыным.

Салт-дәстүрім – тарихым,
Ел ұмытпас тарихын.
Дәстүріміз – алтын мөр,
Өзге елдер танитын.
 

ҰЯ

Ұя салды көктемде,
Қос қарлығаш ұшып кеп.
Біткенше ұя тынбады,
Ары-бері ұшып көп.

Бірі батпақ әкеліп,
Қабырғасын лайлады.
Екіншісі «шименен»,
Керегесін байлады.

Көп еңбекпен ақыры,
Бітірді олар ұясын.
«Кіп-кішкене бұл үйге,
Екеуің қалай сиясың?

Шыныменен таңданып,
Ойланып  көп жүргенде.
Бір күні одан қуандым,
Төрт жұмыртқа көргенде.

Балапаным үшін деп,
Жасапты ғой ұяны.
Балапандар әрине, 
Ұяға еркін сияды.