• Жаңылтпаштар
• 20 Қараша, 2022

ЖАҢЫЛТПАШТАР

Серікбай ОСПАНҰЛЫ

Ойлап-ойлап бас қатты,
Мініп кетті-ау басқа атты.
Шабан ат қой жаман ат,
Қырдан әлі аспапты.
 

* * *
Мініп атқа қара қасқа
Атам бүгін барады асқа.
Атаңды сен қарсы алғайсың
Жоқ қой үйде бала басқа.

* * *
Уақытты жол алар,
Сонда да тез оралар.
Асықпаса ол тағы да,
Үйге бір күн қона алар?

* * *
Қайнағанда ән салатын
Секілді біздің құман.
Далада қатты жел тұрғанда,
Салады екен құм ән.

* * *
Айгүл алдына айна алып,
Қарап отыр ойланып.
Гүлнар оның жанында
Жүгіріп жүр айналып.

* * *
Қонып таңнан атына атам,
Жинап елден алты бақан,
Құрып берді алтыбақан.
Рақмет, алтын ата,
Жем берейін атыңа, ата!

* * *
Төбесіне қораның
Шығып кетті жеті ешкі.
Ал қораның төбесі
Әбден тозған, өте ескі,
Болғаннан соң өте ескі,
Құлап түсті жеті ешкі.

* * *
Ұлықбектің ұлы
Айта алмайды «Ұ»-ны,
Айта алмайды «Ү»-ні,
Айта алмайды «Ы»-ны.
Үйретем қалай мұны?!

* * *
Жесін биыл жазда
Біздің екі қазға
Бір қап тары аз ба?
Онда бос қап табайық,
Екі қабын алайық.

* * *
Ала сиыр, ала қарға
Жүр ғой, әне, ала қарда.
Қарқылдайды қара қарға
Жалпылдайды ала қарға. 

* * *
Жең, жең емей, балақ па?!
Жылқылардың бәрі ат па?!
Ата-бабалардың
Барлығының тамы ақ па?

* * *
Бұзау, қозы, тай, лақ та,
Құлындар да, тайлақ та
Жүрген жаңа сай жақта.

* * *
Секіріп,
Жүгіріп, 
Қарғып,
Ойнадық мақтаны қар ғып.

Қостанай қаласы.

Суретін салған Наталья Ященко