• БАЛДЫРҒАН
• 31 Наурыз, 2022

МАЗАҚТАМАЛАР

Жеткерген  ӘБДІРЕЙҰЛЫ

Ескертпе

Жинамайды төсегін,
Шығармайды есебін.
Қаңғитындай үй көрмей,
Кезбесі ме көшенің?

Ыдыстарды сындырып,
Ыржың-ыржың тұр күліп.
Тыншымайды көңілі,
Жасамаса бір бүлік.

Тиіп сөйлеп шамыңа,
Қағытады қағына.
Жаман қылық тез жұққыш,
Жоламаңдар жанына.

Енгізіпті өзгеріс

Телеарнадан салалық,
Тыңдамайды жаңалық.
Атыс-шабыс киноға,
Отырады қадалып.

Смартфоны ермегі,
Білдіреді ол нені?
Тастаған жоқ қолынан,
Сабағынан келгелі.

Оқушымыз «құрметті»,
Көруге емес міндетті.
Уақыттың кестесін,
Ыңғайына өзгертті.
 

Кімнен үлгі аласың?

Жұрт мақтайды Қанатты,
«Оқушы, – деп, – талапты».
Жақсы оқып сабақты,
Елді өзіне қаратты.

Ешкім жақсы демейді,
Сыныптағы Кенейді.
Қайсы бірін елейді,
Сыпсың-сыпсың көбейді.

Алып тастап аласын,
Бердік біздер бағасын.
Төрелігі өзіңде,
Кімнен үлгі аласың?

Сынақ

Атын білмей атасының,
Шалағайдың шатасуын.

Жаңылыспай аттарынан,
Тәттілерді жатқа-ақ ұрған.

Жеті атасын сұрап едім,
Құлап қалды, «Құлагерім».

Шежіреден шеттегені,
Сынақтан ол өтпегені.
 

Қызылорда облысы.

Суретін салған Ерлан Момбаев