Жұмбақтар

Әли ЫСҚАБАЙ

Тау түбінде іні бар,
Қос көрші кім, біліп ал! (Мұрын)

Зырылдаса айналып,
Беліне шар байланып,
Алғандай бір тон киіп,
Шыға келер томпиып. (Ұршық)

Сауырында – нар тісі,
Тұтасты бөлу – бар ісі. (Ағаш кесетін ара)

Кисең – қампияды,
Шешсең – жалпияды. (Шұлық)

Торсылдақты іліп ем,
Жадыратты нұрымен. (Электр шамы)

Қысы-жазы пішінін
Өзгертпейтін кісі кім? (Шырша)

Бес туыс қалмастан бірі де,
Суықта тығылар бір інге. (Қолғап)

Пар аттың қосағы,
Қалың қарды осады. (Шаңғы)

Шөп үстінде қалтырап,
Моншақ жатыр жалтырап. (Шық)