Мазақтамалар

ҮЙКҮШІК

Ертай деген баланың
Көрсең егер бөлмесін,
Кеш түспестен жабады
Терезенің пердесін.

Теледидар түбінен
Кет демесең, шықпайды.
Кино бітсе, күнімен
Жатып алып ұйықтайды.

Мұндай бала оңбайды,
Көпшілікке аты әйгі.
Ал балалар ондайды
Үйкүшік деп атайды.

ДҮРДАРАЗ

Дәметкен мен Дәмелі
Бірде тату, бірде араз.
Сыртқа шықса әдемі,
Үйлерінде дүрдараз.

Ойнап жүріп, қарашы,
Қалады тез таласып.
Жұмсай қалса анасы,
Отырады санасып.

Қылықтары жасанды,
Керіспеген күндері аз.
Болар екен қашанғы
Бұлар енді дүрдараз?!

Ақылбек Шаяхмет