• Балаларға базарлық
  • 16 Қазан, 2020

Өлеңдер топтамасы

Сары бояу

Сипап өткен самалға
Тербеледі сары алма.

Шолып едім бақшаны,
Қауын біткен сап-сары.

Көрінеді шалғайдан
Бел-белестер сарғайған.

Жарқыраған,
Жайнаған
Сары бояу айналам.

Жомарт күздің бояуы
Дәл осындай болады.

Дәрумендер дауасы

Өрлеу үшін елің,
Түлеу үшін жерің,
Болу керек мықты
Денсаулығың сенің.

Болу үшін зерек,
Болу үшін ерек,
Денсаулықты дәйім
Күтіп жүру керек.

Ішсең егер дәрі,
Зиянды оның бәрі.
Бойға қуат берер
Тағамдардың нәрі.

Дәрумендер тобы –
Мол қуаттың қоры.
Табиғат та емші,
Біліп жүр сен оны!

Алма

Жазда ауылға келіп,
Бау-бақшадан теріп,
Алма жесең, болар
Тісің түгел, берік.

Сен өзіңе-өзің,
Сыйла қуат, төзім.
Алма жесең, өткір
Болады екі көзің.

Сәбіз

Сәбіз жесең жиі, ұқ:
Өсер бойың биік.
Пайдасы көп оның,
Ал ойыңа түйіп.

Өтсе де дерт түйреп,
Қалмайсың сен күйреп.
Сау болады дәйім
Бауыр менен бүйрек.

Қияр

Кірпігің мен қасың,
Тырнағың мен шашың
Берік өссін десең,
Қияр болсын асың.

Бойда болса дертің,
Берер саған серпін.
Өкпең тыныс алар
Ойнағанда еркін.

Қызанақ

Ем-дауасы мәлім
Қызанақ ол – дәрің.
Көбейеді жесең
Бойда қуат, әлің.

Көрсең күнде дәмін,
Берер қажет нәрін.
Таза болып терің,
Толығады қаның.

Қырыққабат

Қырыққабат жайын
Біл де, жеп жүр дәйім.
Ас қорытуға болар
Асқазаның дайын.

Ұшан-теңіз емі,
Әсері жоқ кері.
Қатерлі көп дерттен
Қорғап жүрер сені.

Қызылша

Көкөніс бұл ғажап,
Атын айтар өзі-ақ.
Қызылшаға құмар
Оқушылар озат.

Әр бақшада жатыр,
Жеймін десең, мақұл.
Зейініңді ашып,
Берер саған ақыл.

Картоп

Картоп жесең қалап,
Өсесің тез тарап.
Жүрмейді онда жиі
Қызылиек қанап.

Апаң жасар жылдам,
Емес ботқа құр дәм...
Тек «қытырлақ» зиян
Дүкендерде тұрған.

Асқабақ

Кірсең бақша, баққа,
Көкөніс сал қапқа.
Асқабақ жеп жиі,
Ағзаңды удан сақта.

Асқабақтың дәні –
Денсаулықтың мәні.
Ұйқың болып тыныш.
Сергек жүрші әрі.

Себет-торын талшын
Апаң қолға алсын.
Дәріханаға емес,
Бау-бақшаға барсын.

Бау-бақшаның дәмі –
Дастарқанның сәні.
Мәзіріңде болсын
Дәруменнің бәрі.

Қастек БАЯНБАЙ

17 рет

көрсетілді

0

пікір
Алдыңғы мақала Мазақтамалар

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Редактор блогы

Дүйсен МАҒҰЛҰМОВ

"Балдырған" журналының бас редакторы